Avtalevilkår for Mikkelparken AS

Oppdatert 06.02.2026

Betingelsar og vilkår:

Viktig: Bestillinga er først gjennomført når du har mottatt ordrebekrefting på e-post. Dersom du ikkje har mottatt denne kort tid etter booking, må du kontakte Mikkelparken snarast.

For grupper gjeld eigne bookingreglar.

Desse vilkåra gjeld for bestilling av Mikkelparken sine produkt – billettar, sesongkort, overnatting og andre tilleggsprodukt.

Du er sjølv ansvarleg for å oppgi korrekt informasjon, herunder korrekt stava namn, adresse, e-postadresse og telefonnummer. Ved feilinformasjon kan du verte belasta for kostnader som måtte oppstå. Mikkelparken tek ikkje ansvar for bestillingar som grunna tekniske problem ikkje er mottatt i våre system.

Ved bestilling av fleire hytter/leilegheiter kan me ikkje garantere at dei ligg ved sidan av kvarandre, med mindre du har bestilt spesifikke, nummererte einingar og fått dette stadfesta i ordrebekreftinga.

1. BOOKING AV OVERNATTING/BILLETTAR

Desse bookingreglane fungerer som kontrakt for overnatting og billettar mellom Mikkelparken AS (herunder Mikkelparken, Mikkelparken Ferietun og Sandvik Overnatting) og deg som kunde.

2. INNSJEKK OG UTSJEKK

• Hytter, leilegheiter og luksustelt: Innsjekk frå kl. 15:00. Utsjekk før kl. 11:00.
• Camping: Innsjekk frå kl. 15:00. Utsjekk før kl. 13:00.

3. LEIGETAKAREN SITT ANSVAR

Den som bestiller må vere over 20 år. Aldersgrensa gjeld òg for den som står som ansvarleg på hytta/leilegheita under opphaldet.

4. BETALING

4.1 Nettbestilling

Ved nettbestilling må overnatting/billettar betalast omgåande. Du kan betale med kort, Vipps, faktura eller delbetaling.

4.2 Betaling med faktura og delbetaling (Klarna)

Vel du faktura eller delbetaling, vert transaksjonen handtert av vår samarbeidspartnar Klarna AS. Ved fullføring av kjøpet overtek Klarna fordringa, og all vidare oppfølging skjer direkte gjennom deira system.

• Betalingsansvar: Som kunde er du ansvarleg for at fakturaen vert betalt innan fristen. Ved for sein betaling påløper purregebyr i tråd med Klarna sine vilkår.
• Administrasjon: Du kan sjå, administrere og betale fakturaene dine i Klarna-appen eller på klarna.no.
• Kundeservice: Spørsmål om faktura, utsetjing eller delbetaling må rettast direkte til Klarna.
• Gåvekort: Det er ikkje mogleg å nytte gåvekort frå Mikkelparken som betaling i Klarna-appen. Gåvekort må registrerast i kassa på nettsida før du fullfører kjøpet.

4.3 Betaling ved kjøp over telefon/e-post

Ved manuell bestilling over telefon eller e-post påløper eit bookinggebyr på kr 100,-. Du vil motta ordrebekrefting på e-post med betalingslenke.

• Betalingsmåte: Heile beløpet må betalast med bankkort eller Vipps via lenka. Det er ikkje mogleg å nytte Klarna eller delbetaling på desse bestillingane.
• Bookingalternativ: Kategorien «Basis» er ikkje tilgjengeleg ved manuell bestilling, då denne krev umiddelbar betaling i nettbutikken.
• Betalingsfrist: Oppgjeret må vere registrert seinast 14 dagar før ankomst. Me sender påminning på e-post dersom det står att eit restbeløp når opphaldet nærmar seg.
• Min Side: Du har oversikt over bestillinga ved å logge inn på «Min Side» via mikkelparken.no eller via lenke i ordrebekreftinga.

Betaling ved ankomst vert berre akseptert etter særskild avtale.

5. OM INNGANGSBILLETTAR TIL MIKKELPARKEN

• Levering: Billettar vert sendt som vedlegg til ordrebekreftinga på e-post, og er også tilgjengelege på «Min Side».
• Gyldigheit: Billetten gjeld for datoen som er påført. For 2-dagarsbillettar må dag 2 nyttast dagen direkte etter første dag (påfølgjande dag).
• Personleg bruk: Fleirdagsbillettar og sesongkort er personlege og kan ikkje delast eller overdragast til andre.
• Manglande e-post: Dersom du ikkje mottek ordrebekrefting kort tid etter kjøp, sjekk søppelpost/spam-filteret. Kontakt Mikkelparken omgåande om du ikkje finn den. Bestillinga er først gyldig når ordrebekrefting er mottatt.
• Refusjon: Ubrukte billettar eller sesongkort vert ikkje refunderte.

5.2 Sesongkort

Me tilbyr to typar sesongkort:

1. Ordinært sesongkort: Gjeld alle ordinære opningsdagar i sesongen.
2. Mellomsesongkort: Gjeld alle ordinære opningsdagar unntatt juli månad.

Vilkår for bruk:

• Personleg: Kortet kan ikkje overdragast eller nyttast av andre.
• Bilete: Ved nettbestilling skal bilete av korthaldar lastast opp. Dersom dette ikkje er gjort ved bestilling, må bilete takast i billettluka ved første besøk. Det er korthaldar sitt ansvar å syte for at dette vert gjort.
• Misbruk: Ved brot på billettreglementet eller misbruk, vil sesongkortet verte inndrege for resten av inneverande år utan refusjon.

6. ENDRING OG AVBESTILLING AV INNGANGSBILLETTAR 

Du kan avbestille billettar innan 24 timar etter kjøpstidspunktet via «Min Side», føresett at dei ikkje er tekne i bruk.

• Unntak: Angreretten på 24 timar gjeld ikkje dersom avbestillinga skjer på sjølve besøksdagen. Kjøper du billett dagen før besøket, kan denne ikkje avbestillast på besøksdagen sjølv om det er gått mindre enn 24 timar.
• Refusjon: Avbestilling etter 24-timarsfristen gjev ingen rett til refusjon.

6.2 Endring av billettar 

Du kan endre dato på inngangsbillettar fram til 7 dagar før den opphavlege besøksdatoen. Det er ikkje mogleg å endre dato eller bytte billettar når det er mindre enn 7 dagar til besøket.

Endring kan skje på to måtar:

1. Sjølvbetjening (Gratis): Logg inn på «Min Side». Under «Reservasjonar» finn du billetten din. Trykk på «endre billettar» for å motta ein verdikode tilsvarande billetten sin verdi. Denne koden nyttar du som betaling for nye billettar til ønska dato.
2. Manuell endring (Gebyr): Ved endring via telefon eller e-post påløper eit administrasjonsgebyr på kr 30,- per billett. Du mottek nye billettar på e-post.

7. ENDRING OG AVBESTILLING – OVERNATTING MED/UTAN BILLETTAR

Reglar for endring og avbestilling av overnatting avhenger av vald priskategori. Ved bestilling av overnatting (med eller utan billettar) vel du mellom priskategoriane BASIS og FLEX. Reglane for vald kategori gjeld heile bestillinga, inkludert inngangsbillettar kjøpt i samband med overnattinga.

Betaling kan gjerast med bankkort, Vipps eller via Klarna.

7.1 BASIS (Lågpris) Dette er vårt rimelegaste alternativ for deg som er sikker på reisedatoen:

• Betaling: Krev umiddelbar betaling på nettsida. Kan ikkje bestillast via telefon/e-post.
• Vilkår: Kan berre avbestillast fritt innan 24 timar etter bestilling. Etter dette er kjøpet bindande; ingen endring eller refusjon.
• Forsikring: Ved sjukdom eller uføresette hendingar viser me til di private reiseforsikring for eventuell dekning.
• Oppgradering: Det er ikkje mogleg å oppgradere frå BASIS til FLEX i etterkant.

7.2 FLEX (Fleksibel) Gjev tryggleik dersom planane må endrast:

• Frist: Endring/avbestilling mogleg fram til 3 dagar før ankomst, seinast kl. 15:00.
• Endring: Kontakt oss på telefon/e-post. Gebyr på kr 100,- per endring + ev. prisdifferanse tilkjem.
• Avbestilling: Ved avbestilling innan fristen vert beløpet refundert, minus eit avbestillingsgebyr på kr 100,-.

Henvendelsar om endring/avbestilling av overnatting skal skje til info@mikkelparken.no eller tlf 53 67 13 13.

7.3 Campingplass

Bestilling av campingplass må gjerast digitalt på mikkelparken.no. Me tek ikkje imot campingbestillingar via telefon/e-post. Same vilkår for BASIS og FLEX gjeld for camping som i punkt 7.1 og 7.2.

7.4 Refusjon og tilbakebetaling

Dersom du har krav på refusjon:

• Kort/Vipps: Automatisk tilbakeføring til same betalingsmiddel. Normal behandlingstid 2–4 virkedagar.
• Faktura (Klarna): Tilbakebetaling vert handtert av Klarna. Du får informasjon på e-post frå dei om utbetaling.

8. ENDRING OG AVBESTILLING AV «MIKKELBUFFET»

Ved førehandskjøp av Mikkelbuffet kan bestillinga endrast eller avbestillast kostnadsfritt fram til 2 dagar før den aktuelle datoen. Ved avbestilling etter denne fristen vert ikkje beløpet refundert.

9. TRIVSELSREGLAR OG ANSVAR

Me ønskjer at alle gjester skal ha eit triveleg opphald.

• Ro og orden: Det skal vere ro på området frå kl. 23:00. Ved sjenerande støy eller åtferd som er til ulempe for andre, vil personalet gje åtvaring. Vert ikkje dette etterkome, kan gjesten bortvisast utan refusjon.
• Erstatning: Gjesten er erstatningsansvarleg for skade på inventar, utstyr eller eigedom. Slike skadar vert etterfakturert.

10. HUSDYR

• Overnatting: Ikkje tillate i hytter og leilegheiter. Tillate i luksustelt mot tilleggsgebyr.
• I parken: Husdyr har ikkje tilgang til sjølve Mikkelparken. Me låner ut hundebur gratis (utanfor inngangen). Desse kan ikkje reserverast, men vert registrerte ved ankomst.

11. REINHALD

Sluttreingjering er inkludert i prisen. Me ber likevel om at eininga vert forlaten i ryddig stand. Dette inneber å:

• Tømme søppel.
• Setje på oppvaskmaskina.
• Ta av eventuelt leigd sengetøy og leggje det i returposane.

12. LADING AV ELBIL

Lading av elbil frå vanleg stikkontakt i hytter eller leilegheiter er strengt forbode grunna brannfare. Me viser til offentlege ladestasjonar i nærområdet:

• Ved Mikkelparken: På parkeringsplassen vis-a-vis Mikkelparken Ferietun finn du 8 ladeplassar drifta av Recharge (2 stk. CHAdeMO, 2 stk. CCS, 4 stk. Type 2).
• Kinsarvik Sentrum: På Esso-stasjonen er det 4 ladeplassar drifta av Mer (2 stk. CHAdeMO, 2 stk. CCS, 2 stk. Type 2).

13. HITTEGODS

Gjengløymde gjenstandar i Mikkelparken og på Mikkelparken Ferietun vert oppbevarte i 14 dagar. Saknar du noko? Send ein e-post til info@mikkelparken.no eller ring 53 67 13 13. Ver venleg å oppgi:

• Kva gjenstand det gjeld (skildring).
• Dato for opphaldet/besøket.
• Kvar du trur gjenstanden vart gløymt.

Gjesten må sjølv dekke porto ved eventuell ettersending.

14. PARKERING

• For buande gjester: Det er gratis parkering for éin bil per bueining inne på Mikkelparken Ferietun.. Øvrige bilar må parkerast på den store parkeringsplassen utanfor Mikkelparken.
• For dagsgjester: Det er gratis parkering utanfor Mikkelparken.

Alternativ parkering: På travle dagar kan hovudparkeringa bli full. Me viser då til alternative parkeringsplassar (alle i gangavstand): utanfor Hardanger Bestikk, ved Kinsarvik kyrkje og vis-a-vis Esso i sentrum.

15. ATTERHALD / FORCE MAJEURE

Mikkelparken tek atterhald om driftsstans på attraksjonar, aktivitetar eller underhaldning som følgje av vêrforhold, tekniske problem eller force majeure. Det vert ikkje gjeve refusjon eller kompensasjon ved slike tilfelle.

16. RØYKEFORBOD

Røyking er strengt forbode innandørs i alle bueiningar. I Mikkelparken er røyking berre tillate i merkte røykesoner (sjå parkkart).

17. REKLAMASJON – MANGEL

Eventuelle feil eller manglar må meldast resepsjonen så snart som råd under opphaldet, slik at me får moglegheit til å rette det. Kontakt oss i resepsjonen, på info@mikkelparken.no eller tlf 53 67 13 13.

18. PERSONVERN (GDPR) Me handsamar personopplysningar i tråd med norsk lov. Informasjonen vert ikkje delt med tredjepart. Me kan nytte informasjonen til å sende relevant informasjon om produktet/tenesta du har kjøpt.

19. JURIDISK ANSVARLEG

Mikkelparken AS er juridisk ansvarleg for transaksjonar gjennomført på denne nettsida.

Adresse: Mikkelparken Ferietun Kinsarvikvegen 64, 5780 Kinsarvik Org.nr: 878 707 192

Kontakt: Telefon: 53 67 13 13 E-post: info@mikkelparken.no